Jаневски: 2019-та ја заокружуваме со раст на бројот на странски туристи, ноќевања и девизен прилив

Скопје/Охрид, 27. декември 2019 (ИНПРЕС) – Тековната 2019-та година туристичката индустрија ја заокружува со раст во поглед на бројот на странски туристи, ноќевања и девизен прилив. Најсилните индикатори за пораст на туризмот во последните две години бележат покачување од 30%.

За Агенцијата за промоција и поддршка на туризмот (АППТ) една од стратешките цели е продолжувањето на туристичката сезона, што во тековнава 2019-та година ја реализираше со тоа што туристичакта сезона почна во април, а заврши во ноември. Со тоа, 2019-та година ќе резултира со околу 1,3 милион туристи, 3,5 милиони ноќевања и 308,5 милиони долари девизен прилив по ставка туризам за првите три квартали, што е во линија на очекувањата и таргетите на АППТ.

Карактеристично е што оваа година две групи туристи имаа најголем раст, а други забележаа кумулативен раст. Шпанците и Грците се најбројни, со околу 50 проценти во првите 10 месеци од годинава, што дава голем потенцијал за отпочнување на соработка со шпанскиот пазар, каде иницијалниот чекор ќе биде учество на саем за туризам. Турскиот пазар од друга страна се стабилизираше, турболентните настани во нивната држава директно се одразија на бројот на туристи и ноќевања кај нас во првите неколку месеци од 2019та година. До крајот на оваа година се очекува бројот на турски туристи да достигне 120.000 и наредната 2020 да расте поради најавите за нови чартер летови од Измир (12 летови во текот на сезоната и пакети од 3-5 дена).

Земајќи ги предвид светските трендови, Република Македонија со целиот природен потенцијал со кој располага, се позиционираше високо на листата на приоритет дестинации на новите генерации. Тоа го стави фокусот на АППТ на слободните патувачи, кои сакаат да бидат дел од локалната традиција, организирајќи си го одморот сами и во времетраење не повеќе од 3-4 дена. Согласно ова, АППТ предвиде за наредната година продукција, дизајн, изработка, печатење и дистрибуција на водич „Слободни патувачи “ за полесно да ги води низ понудата на нашата држава.

АППТ со цел да ги привлече овој, па и секој друг потенцијален турист, интензивно работи на промоција на туистичките потенцијали на земјава преку активно користење на сите промотивни алатки. Вториот дел од традиционалното рекламирање во медиуми за 2019та година ја претстави зимата во Република Македонија заедно со целата традиција, култура и гастрономија. Рекламирањето овој пат беше 100% на интернет, оставајќи ги зад себе традиционалните медиуми поради строго определениот таргет на гости кој е заинтересиран за овој тип на одмор кој вклучува активни спортови.

Една од поважните алатки со кои се промовира државава, но пред бизнис заедницата, се интернационалните саеми за туризам кои во 2019та беа 13 на број и на кои учествуваа неочекувано голем број на претставници од домашниот туристички сектор. Најавата на нови чартер линии со хрватскиот национален авио превозник, нови линии Софија-Охрид, како и чартер линија на ТУИ од Белгија се едни од најзначаните успеси кои ветуваат уште поголем раст за наредната 2020-та година. Учеството на саемот за туризам во Сингапур заедно со Србија и Црна Гора за разбуди интересот за регионов на азискиот пазар кој претставува огромен потенцијал не само за Република Македонија, туку за целиот балкански регион. Со учество на овој саем се очекува пораст на бројот на туристи од Азија за 50%, зајакнување на регионалната соработка, како и идно заедничко претставување на Балканот како една дестинација за трети пазари.

Согласно ова, АППТ до крајот на годината има 89.93% степен на реализација на буџетските средства.
Агенцијата за туризам во 2020-та ќе понуди нов пристап на промовирање и ќе форисира уште поголема отвореност кон туроператорите, како домашните така и странските. Всушност, пред нас се неколку предизвици, а најголемиот е да ги задржиме туристите ден повеќе во нашата земја.

За наредната година во годишната програма, согласно стратешкиот план, предвидени се промотивни активности кои се од суштинско значење за промоција на Република Македонија. Организирање на промотивни кампањи во Србија, Словенија, Хрватска, Бугарија, Албанија, Косово, Полска, Германија, Романија, Шведска, Италија, Израел, Турција и Германија. Како новитет се западноевропските пазари со кои имаме директни авионски линии и кои ја насетуваат понудата на РС Македонија, што значи дека потребно е работа и фокус на тур-оператори, соработка која директно ќе се одрази на бројот на туристи од овие пазари.

Како еден од новитетите на АППТ е соработката со Националната установа – Ансамбл за народни игри и песни „Танец“, соработка со која ќе се настојува да се оддржи духовното и материјалното наследство на Република Македонија во рамките на државата и надвор. Ова ултимативно значи и нова форма на промоција со која ќе се негуваат нашите вредности и нивна промоција на меѓународно ниво преку песни отсвирени на традиционални инструменти и танци одиграни во автентични носии.

Наредната, 2020-та година промоцијата ќе се збогати со продукција, дизајн, изработка, печатење и дистрибуција на фото брошура која цели кон подобра промоција на социјалните медиуми, односно, со користење на хаштаг на социјалните медиуми ќе се собираат тематски фотографии од нашата земја, кои потоа ќе бидат дел од печатено издание – фото-брошура. Предвидена е и продукција на 360 виртуелни тури за туристички дестинации во Република Македонија.

И оваа година беше во знакот на активните форми на туризам, што неопходно наложи мапирања на потенцијалните точки и региони кои нудат можност за развој на авантуристичките форми на туризам кои ќе се лансираат како едни од најпопуларните дестинации за задоволување на авантуристичките апетити. Агенцијата за туризам во соработка со институциите, здруженијата и сите инволвирани и засегнати страни целосно ги реализираше проектите за Спортско качување и Алпинизам. Ултимативната цел на ваков тип на активности е општ пораст и развој на туризмот како индустрија во земјава и воедно пораст на една целна група на туристи – слободни патувачи, кои се симбол за авантура и независност. Во постапка е реализацијата на проектите за 10 најкачувани врвови во Македонија што опфаќа обележување на неколку правци на качување на Бислимска клисура – Куманово и поддршка за развој на локалитет Кукуље село Нов Истевник, Делчево.

АППТ во 2019-та ги означи и спортско качувачките локалитет на местата Кадина Река, Демир Капија и Маврово, додека наредната година е предвидена реализација на проект за збогатување на туристичката понуда на езеро Козјак. Во соработка со локалната самоуправа од општина Желино, ќе се изработат видиковци и одморалишта и ќе се означат со информативни табли туристичките потенцијали.
Наредниот период ќе се работи на проект „Изработка на Археолошки водич“ кој ќе ја сублимира археологијата во државава, а ќе биде наменет за странската и домашната јавност и преведен на неколку светски јазици.

Проектот „Тумба Маџари“ значи обележување на археолошкиот локалитет што ќе придонесе за зголемување на посетеноста на локалитетот кој го опишува животот на луѓето пред 8.000 години.
Упорната промоцијата на туристичкиот потенцијал и поддршката на туризмот преку различни проекти несомнено помагаат во реализација предвидениот раст за 2020-та година кој се очекува да биде од 5% до 7% во бројот на туристи и ноќевања, односно, надмнување на бројката од 1,3 милиони туристи и приближно 4 милиони ноќевања.

За оваа цел, во годишната програма за 2020година, за субвенционирање на странскиот организиран туристички промет се наменети вкупно 80.000.000 денари, додека во 2019-та година има реализација од 99,83% на предвидениот годишен буџет за субвенциониран странски туристистички промет. (Крај)

извор: ИнПрес фото: архива